Türkiyənin məşhur «Kanal D» televiziyası Azərbaycanın işğal altında olan ərazilərindən reportaj hazırlayıb. Şuşa, Laçın, Xocalı və Xankəndində aparılan çəkiliş telekanalın Mehmed Ali Birandın müəllifi olduğu «Xəbərlər» proqramında yayımlanıb. İşğal altında olan ərazilərimizi gəzən «Kanal D»-nin çəkiliş qrupu həmin yerlərdə yaşayan ermənilərlə də görüşüb.
Şuşada aparılan çəkilişlərdən görünür ki, orada ermənilərin məskunlaşması kütləvi hal alıb. Şuşada normal həyat tərzi keçirən ermənilər telekanala müsahibələrində həyatlarından məmnun qaldıqlarını deyiblər. Şuşa işğal olunanadək azərbaycanlılarla qonşu olan erməni Artur azəri qonşularını gözlədiklərini deyib. Münaqişənin tezliklə həlğ edilməsini səbirsizliklə gözlədiklərini deyən erməni keçmiş qonşularının Şuşaya qayıtmasını arzulayıb.
Şuşadakı çəkilişlərdən o da görünüb ki, Şuşa Məscidinin bir hissəsi ermənilər tərəfindən dağıdılıb.
Laçın dəhlizində olan türkiyəli jurnalistlər ermənilərin təhlükəsizlik zolağı adlandırdığı bu yolun təmir edildiyinin şahidi olub.
Azərbaycanlıların soyqırım edildiyi Xocalıya isə erməni generalı İvanyanın adı verilib. O İvanyan ki, Xocalıda baş verən qətliamın rəhbərlərindən olub.
Daha sonra çəkilişlərini Bakıda davam etdirən «Kanal D» əməkdaşları ictimaiyyət nümayəndələri və sadə vətəndaşların Türkiyə Ermənistan münasibətləri ilə bağlı fikirlərini öyrəniblər. /Bizim Yol/
_thumb.jpg)
