Verilən
məlumatlara görə, Beynəlxalq Əfv Təşkilatı Səudiyyə Ərəbistanında 3
minə yaxın insanının haqsız yerə həbs edildiyini və işgəncələrə məruz
qaldığını müəyyən edib
Belə ki, sözügedən təşkilat “11 Sentyabr” hadisələrindən sonra Səudiyyə hökumətinin bir
çox insanı məhkəməyə çıxarmadan həbsdə saxladığını bildirib. Habelə
təşkilat sözügedən ölkədə terrorla mübarizə adı altında insan
haqlarının pozulduğunu, Qərb ölkələrinin isə neftlə zəngin olan
müttəfiqlərini itirməmək üçün bunu örtbasdır etməyə çalışdıqlarını
hesabatda deyib. Bundan başqa hesabatda bildirilib: “İnsan haqlarının
pozulması yüksək həddə çatıb. Hər gün yüzlərlə insan təhlükəsizlik
qüvvələrinin təzyiqinə məruz qalır”. İllərcə haqlarında heç bir cinayət
işi qeydə alınmayan və yaxınları ilə görüşdürülməyən insanların heç bir
qanuni haqlarından da istifadə etmədikləri hesabatda öz əksini tapıb.
Məhbusların törətmədikləri cinayətləri etiraf etmələri üçün ağır
işgəncələrə məruz qaldığı göstərilən hesabatda, ən çox tətbiq edilən
işgəncə növləri arasında elektriklə işgəncə, yuxusuz saxlanılma və
dəyənəklə döyülmə hallarının daha çox olduğu bildirilib. Məlumatlara
görə, ABŞ tərəfindən illərlə Quantanamo həbsxanasında saxlanılıb sonra
sərbəst buraxılan insanların da hal-hazırda Səudiyyədə məhbus həyatı
yaşadığı bildirilib.
