Dünya xristianları milad bayramını qeyd etdi
Dünən xristian aləmində milad bayramı qeyd edilib. Bayram ayini Vatikanda Müqəddəs Pyotr kilsəsində başlayıb. Roma papası 16-cı Benedikt bütün dünya xristianlarının müqəddəs bayramını təbrik edib. Roma papası bayram ayini zamanı xristianları bu müqəddəs bayramı kommersiyalaşdırmaqdan çəkinməyə çağırıb. Pontifik vurğulayıb ki, «üzdə olan parıltının altında» xristianlar üçün bu bayramın əsas mahiyyətini görmək lazımdır. Katoliklər və protestant kilsələrinin davamçıları isə milad bayramını dekabrın 24-də deyil, 25-də qeyd edirlər- "anspress" "accociated press"ə istinadən xəbər verir.
Bütün dünyadan minlərlə dindar və turist Yaxıq Şərqə, İsa peyğəmbərin anadan olduğu ehtimal edilən Vifliyemə səfər edib. Vifliyemdə möhtəşəm milad ayini keçirilib. Ayin zamanı Qüdsün latın patriarxı Fuad Tual bütün Yaxın Şərqə sülh arzulayıb. Patriarx qeyd edib ki, Suriya, İraq və Şimali Afrika ölkələrinə sülhün qayıtması üçün dua edir.
Amerika Birləşmiş Ştatlarında da milad bayramı təntənəli şəkildə qeyd edilib. ABŞ prezidenti Barak Obama və xanımı Mişel Obama bütün həftə boyu radio və İnternet vasitəsilə ölkə əhalisinin bayramını təbrik edərək, İraq və Əfqanıstanda xidmət etmiş Amerika hərbçilərinə xüsusi təşəkkür mesajı göndəriblər.
Əfqanıstanda xidmət edən Beynəlxalq Təhlükəsizliyə Dəstək Qüvvələri isə milad bayramını paytaxt Kabildəki NATO bazasında yaradılmış kilsədə qeyd ediblər. Bayram ayinlərinə qatılan hərbçilər bu günü ailələri ilə keçirməyi arzuladıqlarını deyiblər.
Milad bayramı Şərqi Asiya ölkələrində də qeyd edilib. Tayvanda minlərlə adam milad ərəfəsi paradında iştirak etmək üçün paytaxt Taypeyin küçələrinə çıxıb. Tayvan əhalisinin əksəriyyəti buddist olsa da, xristian bayramları burada getdikcə məşhurlaşır. Şəhər polisi paradın önünə gedib, Santa Klaus geyimində olan insanlar isə parada tamaşa edən izdizama şirniyyat paylayıblar. 2 saat davam edən parada akrobatlar və milad nəğmələri oxuyan qruplar daha da rəng qatıb. Süni qar istehsal edən maşın isə şəhərdə milad ab-havası yaratmağa kömək edib.
