Fransa qondarma "erməni soyqırımı"nın inkarına görə cinayət məsuliyyətini nəzərdə tutan qanun layihəsini qəbul etməyə tələsir
Trend-in məlumatına görə, bu barədə "dpa" agentliyi Fransa İctimai radiosuna istinadən xəbər verir.
Ölkə hökuməti mübahisəli qanun layihəsini yanvarın sonlarında baxılmaq üçün Senata təqdim etməyi planlaşdırır.
Dekabrın 22-də Fransa parlamenti qondarma "erməni soyqırımı"nın inkarına görə cinayət məsuliyyətini nəzərdə tutan qanun layihəsini qəbul edib. Bu, Türkiyə tərəfinin kəskin reaksiyasına səbəb olub və nəticədə Ankara öz səfirini bu ölkədən geri çağırıb və Parislə hərbi əməkdaşlığı dayandırıb.
Qanun layihəsinin qüvvəyə minməsi üçün sənəd Senatda təsdiqlənməlidir.
Əgər qanun layihəsi Senatda təsdiqlənərsə, onda "erməni soyqırımı"nı inkar edənlərə qarşı bir ilədək azadlıqdan məhrumetmə cəzası və 45 min avro həcmində cərimə nəzərdə tutulacaq.
Türkiyənin Baş naziri Rəcəb Tayyib Ərdoğan isə Fransa parlamentinin bu qərarının və Fransa Prezidenti Nikola Sarkozinin türklərin və müsəlmanların əleyhinə olduğunu bildirib.
Ermənistan və erməni lobbisi bəyan edir ki, Türkiyənin sələfi olan Osmanlı İmperiyası 1915-ci ildə Anadoluda yaşayan ermənilərə qarşı soyqırım törədib. Erməni təbliğatının təzyiqi ilə bir sıra ölkələrin parlamentləri 1915-ci il qondarma "soyqırım"ı tanıyıblar.
