“Son vaxtlar qonşu İranın bəzi din xadimləri tərəfindən ölkəmizin, ölkə prezidentinin ünvanına səsləndirilən fikirlər qərəzlidir və böhtandır”
APA-nın xəbərinə görə, bu fikirləri Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə QMİ Elmi Dini Şurasının iclasında deyib.
O, Azərbaycanda din-dövlət münasibətlərinin yüksək səviyyədə olduğunu, dövlət müstəqilliyinin bərpasından sonra bu sahədə böyük işlər görüldüyünü qeyd edib.
A. Paşazadə son zamanlar İrandakı bəzi din xadimlərinin çıxışlarını, Azərbaycanın Təbrizdəki konsulluğu qarşısında keçirilən aksiyalarda səslənən fikirləri böhtan adlandırıb və müstəqil Azərbaycanın daxili işlərinə müdaxiləyə cəhd kimi qiymətləndirib.
