Fəvvarələr meydanında polis və müxalifət tərəfdarları arasında qarşıdurma yaranıb
Bu gün Bakıda İctimai Palatanın razılaşdırılmamış etiraz aksiyası keçirilib. ANS PRESS-in məlumatına görə, aksiyanın təyin olunduğu “Fəvvarələr” meydanına buraxılmayan müxalifətçilər paytaxtın ayrı-ayrı hissələrində qrup halında müxtəlif şüarlar səsləndiriblər.
Aksiya iştirakçıları “28 May” küçəsi və “Azadlıq” prospekti istiqamətində toplaşmağa cəhd etsələr də, polis aksiya cəhdinin qarşısını alıb. Bir qrup aksiya iştirakçısı is şüarlar səsləndirə-səsləndirə Füzuli küçəsi ilə Dövlət Dram Teatrına doğru irəliləyib.
Etiraz aksiyası zamanı Səməd Vurğun küçəsində bəzi mağazaların, tikililərin, habelə “Bank Standard”ın şöbəsinin pəncərələrinin şüşələri və qapısı sındırılıb. Aksiyanın təşkilatçıları isə bildirib ki, baş vermiş hadisə təxribatçılar tərəfindən törədilib.
Xeyli sayda saxlanılanların olduğu bildirilir. Saxlanılanlar arasında "Müsavat" partiyasının İcra Aparatının sədri Arif Hacılının da olduğu bildirilir.
